الدماغ المصرية والذوق العام

إيه اللي حصل لكم يا مصريين؟!! ليه ذوقكم بقي عامل كده؟!! مين اللي أقنعكم تلبسوا بالطريقة دي وتزينوا شققكم بالشكل ده وتعملوا في بلدكم كده؟!! وإزاي إتحولنا بعد ما كنا مصدر الموضة مع باريس إلي السيرك المتحرك في الشوارع بالشكل المنفر ده!!! لما نتفرج علي صور أهالينا في الأربعينيات والخمسينيات والسيتينيات وبداية السبعينيات نلاقيهم قمة في الأناقة والذوق والشياكة والنضافة و"العيائة" نتفرج بقي علي مناظرنا دلوقتي ومن بداية الثمانينات ونشوف بقي مهرجان الأذواق والألوان والإبداع في تركيب كل مالا يليق علي بعضه. ليه كده!!!!
الموضوع إبتدا تقريبا بعد بداية الغزو الوهابي علي الأفكار المصرية القادمة مع بتوع الخليج، وإتغير الذوق العام في اللبس وبدأ في التطور للأسوء لحد ما وصلنا إن القبح بقي هو الأساس والعك بقي السمة السائدة.
الموضوع ملوش علاقة إطلاقا بالفقر ولا قلة الدخل، الموضوع له علاقة بالذوق... وهو ده السؤال؛ إيه الي حصل لذوقنا؟!! ممكن جدا بأقل التكاليف نلبس حاجة شكلها حلو ونزين بيتنا بشكل شيك ونخلي الشوارع منظرها يفتح النفس، مش بالفلوس إطلاقا لكن بالذوق. يعني المحل اللي حاطت بضاعة شكلها يقلب المعدة والحجة إنه بيبيع رخيص، كان ممكن برضه بأقل التكاليف تصنع حاجة شكلها أحلي بدل ما تبقي شكلها أسوء "بنفس الفلوس والله" فتبقي النتيجة إننا نتفرج علي فلكلور ألوان وموديلات معرفش إقتبسوها منين في الشوارع. وأكبر دليل علي إن الذوق ملوش علاقة بالفقر لما بنلاقي العروسة اللي فرحانه بشقتها الجديدة وفخورة بيها قوي ومنزلة صورها علي الفيسبوك وطبعا علشان تبين قد إيه معاها فلوس وأهلها جابولها اللي نفسها فيه وإزاي العريس دفع دم قلبه علشان يتجوزها فهي إشترت كل حاجة ممكن تتحط في عشر شقق وحطتها في شقة واحدة فتتحول الشقة إلي معرض سلع معمرة علي معرض موبيليا تتخله ألوان مريبة علي الحيطة وستاير من كل شكل ولون ملهاش علاقة بأي حاجة! نسيت أو متعرفش أصلا إن منتهي الشياكة في البساطة!
المصيبة الأكبر بقي في "الإستسهال" يعني تلاقي الموظفة من دول تستسهل وتخرج بشبشب علشان مريح أكتر ورجلها بتتنفس فيه علي راحتها، وياريتها بتغسل رجليها ولا بتتبع أبسط قواعد نضافة كعوب الرجلين، لا تلاقي رجليها مقشفة وضوافرها سوداء... طيب وما ذنب الشعب!!!! ولو لبستي جزمة يا بعيدة هيجرالك إيه!! زي اللي تنزل برضه بأي حاجة علي أي حاجة علي طرحة مربوطة بإهمال دليل علي القرف، طيب إنتي قرفانه إحنا ذنبنا إيه!!!! ليه بنعمل في نفسنا كده!!
وإزاي هنرجع الذوق الراقي لمجتمعنا وإحنا من أسوء لأسوء لأسوء! هو ده غضب من ربنا علينا!!!
اللي عاوز ينتحر ينزل يتفرج علي الشوارع كام ساعة ولو قدر يستحمل له الأجر والثواب...
إرتقوا يرحمكم الله.

ع الماشي كده

و السعادة جنان.. اتجنن لو الضحكة العالية جنان.. إتجنن
لو الحب جنان.. إتجنن

لو الحضن جنان.. إتجنن
لو الطيبة جنان.. إتجنن
لو المرجيحة جنان.. إتجنن
لو الفضفضة جنان.. إتجنن
----------------------------------------------------------------------------
عيش حياتك زي ما أنت تحب مش زي الناس ما تحب
عيش حياتك لنفسك مش لغيرك
عيش حياتك وحب نفسك ما تحبش غيرك وبس
عيش حياتك كأنك ستموت غدا

أفكار جميلة لعزيزتي حواء - كوني آنثي لنفسك

عزيزتي حواء:
دي بعض الافكار المحبب إتباعها وخصوصا في فصل الصيف، طبعا دي أفكار عامة تقدري تنفذيها كلها أو بعضا أو تضيفي عليها لمستك الخاصة وذوقك. طبيعي إن حواء العاملة هيبقي صعب عليها تنفذ كل الأفكار دي في وسط الأسبوع لكن ممكن تنفيذها يوم الأجازة هتفرق جدا معاها
قبل ما تنامي⁩:
- حاولي تاخدي شاور دافيء لو الجو مناسب
- حاولي تلبسي أحلي ما عندك، مش بس الخروج اللي يستاهل منك الاهتمام
- إدهني إيدك بكريم لليد رائحته حلوة علشان تشمي ريحة حلوة قبل النوم
- حطي body splash هيفرق كتير في إحساسك بجسمك
- حطي كريم الليل علي وجهك ودلكيه كويس
- سرحي شعرك وكإنك خارجة وإهتمي به وبرائحته
- ولعي شمع بريحة في غرفة النوم، ريحته هتفرق قوي
أول لما تصحي:
- إشربي ميه كتير علي الريق بتحسن أداء الجسم وتنقي البشرة
- خدي شاور متين
- إغسلي وشك ب Facial wash محترم أحسن من الصابون العادي أو إستعملي صابونه أورجانيك
- دلكي إيديكي بكريم لليد لطيف وله ريحة حلوة
- دلكي وشك بكريم نهاري ملطف
- عطري جسمك ونفسك ب body splash لطيف
- غيري هدوم النوم وإلبسي لبس بيتي حلو
- سرحي شعرك تسريحة حلوة وكإنك خارجة
- حاولي تقضي فترة إستجمام قبل ما تبتدي يومك، فوقي وإشربي قهوة أو شاي وبعد كده توكلي علي الله
وأخيرا وليس أخرا؛ إهتمي برجليكي جدا جدا جدا

رجليكي ثم رجليكي ثم رجليكي صيفا وشتاءً، منظر ضوافر الرجلين مهم جدا ونعومة الكعبين شيء أساسي وليس إضافي، صوابع رجلين الأنثي عنوان نضافتها

قصص قصيرة

كلما تلفتت تجده حولها، نظرة عينيه وكف يديه يحيطان بها... سألها: أاتعدي علي حريتك؟.. ردت عليه: هذا هو الحب حبيبي (إحتواء).

فكرت للحظات أن تتركه وترحل وفي لحظة تذكرت ما بينهم ذكرياتهم مواقفهم ضحكاتهم الأوقات الصعبة والحلوة، لا لن تتركه فهو الحياة لها.

ترك اللعبةمن بين يديه ليسأل لماذا هي مهمومة فأجابت والهم يطل من عينيها أنا بخير وعلي الرغم من عدم تصديقه لها إلا أنه أكمل لعبه.

مع كوب اللبن الساخن مساء جلست تفكر في أيامها الماضية، وإبتسمت إبتسامة رضا فهي دائما ما تفعل الصواب.

كتبت بعض كلمات الحب ليقرأها، وبعدها سألها لمن كتب هذه الكلمات ولما قالت أنها له وحده لم يصدقها!

هٓلٓ عيد الحب مجددا وهي وحيدة، تذكرت متي كانت أخر مرة إحتفلت به ولكنها إكتشفت أنها لم تحتفل
به من قبل.. تعيس هو قلبها الخاوي.

غمرتها البرودة ليلا وهي نائمة فأحكمت الغطاء الثقيل عليها، ولكنها تذكرت أن البرودة تأتي من قلبها
الخاوي، من حب ولا وتركها خاوية.

كانت تظن أنه يحبها هي بل كانت متأكدة من حبه، لتتفاجأ بأنه جاء ليصرح لها بحبه لفتاة أخري ويطلب منها المشورة والنصيحة.

وضعت المفتاح بالباب وهمت بفتحه عندما تذكرت أنه ليس بالداخل، تراجعت عن الدخول لوهلة ثم تذكرت، رائحته ما زالت موجودة وهي كافية.

تتحول الصداقة إلي حب ولكن هل يتحول الحب إلي صداقة؟! سؤال ظل يلح عليهما بلا إجابة، ولكن
تبقي التجربة خير دليل، فهل يقدران!

لما تأكد من تعاستها الكاملة وذبولها، إعتصر قلبه بين يديه... تركها... لعل حياة أخري تحياها وتسعد
فيها بدونه.

أصبحت تخاف النوم، ترهب الأحلام... وكأن أحلامها تعاقبها وتعذبها بمعاني قاسية لا تقدر هي علي إحتمالها.

عندما أحبته ظنت أنها ملكت الكون بنجومه وكواكبه وسماءه الفسيحة، لم تكن تدري بأن حبه هو خطيئتها الوحيدة التي ستحرقها وتحرق عمرها.

تعلم أن اللقاء مستحيل ولكنها ما زالت تتحلي بالأمل، قد تراه في مناما وتهرب معه في خيالاتها ولكنه
أبدا لن يغيب ففي دمها سكن.

نظر إليها في صمت وأرخي عينيه كيلا تري الحزن فيهما، لابد من الرحيل فإنه أصبح الحقيقة الوحيدة بينهما، تُري ستصبح أفضل من دونه؟!

كانت تظن أنه الفارس الذي يأتي علي جواداً أبيض ليقتحم أسوارها ويخطفها عليه، ولكنها وجدته مجرد رجل يلهث وراء مصاعب الحياة.

عندما قرر الخروج من صمته والبوح بمكنون قلبه لها كان قد إستنفذ أخر طاقات الصبر لديها.. رحلت وتركته ضحية لتردده.

غريبة هي الصدفة... تجعل من الغريب أقرب قريب، تجعله النفس الذي نحيا به والعين التي نري بها والقلب الذي ينبض.
---------------------------------------------
أصبح قدره الأخطاء... وأصبح قدرها الغفران.

لن تلومه.. فقط تلوم نفسها.. هي من أحبته ولم يجبرها علي هذا الحب.

إستيقظت علي صوت المطر يهطل بغزارة نظرت إليه نائما لتدرك أن لا شيء في الكون أجمل من النظر إلي وجهه.

عندما تأكد من إمتلاكه للزهرة إطمأن قلبه ونسي الوعد، ركض ليرتشف رحيق زهور أخري ونسي أنه تركها تزبل وحيدة

ركض كطفل لأحضانها وأغمض عينيه خجلا من زلاته، ولكنها قد علمت أن قدرها أن تتسامح... فهي تحبه

عندما أحبته علمت أنه طفل كبير وقدرها أن تحميه في أحضانها العمر كله.

سألها؛ أتحبيني
فأجابت ولماذا السؤال فأنت أعلم مني بالرد
فأجاب؛ لأني أعشق سماعه كلمات الحب من شفاه الورد

إستيقظت بخفة وسارت علي أطراف الأصابع لتفاجأه بأول كوب قهوة ساخنه من يديها ليفاجئها بأنه كان يتسني الفرصة ليتسلل من خلفها ويقبلها.

أراد أن يشاركها كل اللحظات في كل الأماكن فقرر أن الخيال هو تذكرة السفر الوحيدة الصالحة لهذه الرحلة.

في لحظة مسروقة من الزمن قررت ترك العنان لنظراته لتقرأ فيها ما عجز اللسان عن النطق به، فقرأت قصة حبهما سويا .

وفي لحظة شجاعة نادرة قررت أن تترك العنان للكلمات لتنطلق من محبسها الدائم لتخبره بكل ما يجيش في الصدر .

تبادلوا النظرات لمدة ثانية واحدة لتدرك أن كل هواجسها ما هي إلا الحقيقة المؤلمة.

جاهدت كثيرا لتهرب من نظراته المصوبة إليها في كل لفتة... ولكن إلي متي تستطيع الهروب؟!

شوية فضفضة

كلما استرجعت أيام حكم المجلس العسكري أجد الكثير من الأسئلة تراودني ولا أجد لها إجابة شافية، منها علي سبيل المثال لا الحصر: لماذا صعد نجم جماعة الإخوان بهذا الشكل السريع والكبير في عهد المجلس العسكري؟ ولماذا أصبحوا في وقت قصير ذوي نفوذ في صنع القرار السياسي؟ ولماذا تم الزج بهم في مختلف أنواع الحياة السياسية المصرية لدرجة تحكمهم الكامل في عملية الاستفتاء علي تعديل الدستور والتي تمت في ١٩ مارس ٢٠١١ والتي إنتهت بالنتيجة التي أرادها الإخوان وحلفاءهم فقط؟ ولماذا قام المجلس العسكري بضم صبحي صالح المحامي الاخواني في لجنة تعديل الدستور وهو لم يكن له سابق شهرة كفقيه قانوني في نفس الوقت الذي غاب عن اللجنة أي تمثيل لأحزاب أو تيارات سياسية أخري؟ ولماذا تم تزليل كل العقبات أمام الأخوان للوصول إلي حكم مصر لدرجة الإشتباه في تزوير الإنتخابات لاحتساب النتيجة لصالح محمد مرسي مرشح الإخوان وخسارة الفريق أحمد شفيق المحسوب علي القيادات العسكرية؟! لماذا قام المجلس العسكري بكل هذه التنازلات في حين أنه كان علي علم بكل جرائم الإخوان الماضية وما قاموا به قبل وأثناء وبعد ثورة ٢٥ يناير ٢٠١١ للوصول للحكم؟! أسئلة كثيرة لا إجابة لها وخاصة بعدما ساند الجيش الشعب في ثورته العظيمة للتخلص من حكم الإخوان في ٣٠ يونيو ٢٠١٣... أكان يريد المجلس العسكري الإيقاع بالإخوان لكشف خيانتهم للشعب بالدليل العملي؟ أكانوا يريدون الشعب أن يعرف الحقيقة كاملة بالتجربة العملية وبعدها يتدخلون لانقاذ الشعب حتي يستوعب الشعب الدرس بالطريقة الصعبة؟ وإذا كان هذا هو الهدف؛ فلماذا عرضوا مصر لهذه للتجربة المريرة والتي كانت من الممكن أن تؤدي بمستقبل البلاد؟ لم تكن تجربة الإخوان سهلة علي الدولة والشعب، ومازالنا ندفع الثمن غاليا من ضياع أمننا وسلامة أولادنا، مازلنا ندفع ثمن حكم الإخوان حتي الآن بسبب تحكمهم في مفاصل الدولة وأجهزتها الحيوية بعدما كرسوا كل الجهود خلال عام واحد لنشر رجالهم في كل إدارة بكل وزارة في مصر، مازل الإخوان يدمروا في مصر داخليا وخارجيا علي أمل الرجوع وتحقيق مآربهم الدنيئة. وكل هذا بسبب أخطاء المجلس العسكري سواء كانت بقصد أم من غير قصد مع إني أشك أن لا يكون المجلس العسكري علي علم بمخطط الإخوان حتي من قبل ثورة يناير حيث أكدت المخابرات أكثر من مرة علي علمها بمخطط الثورة من قبلها بفترة كبيرة. لماذا تحالف المجلس العسكري مع الإخوان!!! سؤال نتمني أن يجيب عليه التاريخ قريبا مع إن الإجابة قد تكون واضحة للكثيرون

الدماغ المصرية وأنابيب البوتاجاز

الدماغ المصرية وأنابيب البوتاجاز

و في المركز الثاني يجي صوت البياعيين...... مش حقدر أوصفه بصراحه... حاجه فوق الخيال... الصوت لازم يتسمع... حاجه كده أبشع من النعيير.... تخيل بني آدم بينعر! من أول ما يدخل البياع للشارع وهو بيحاول ينده علي البضاعة إللي معاه، ويوصف بقي إنه معاه خيار وطماطم وفلفل وبطاطس... وكل ده طبعا بصوت عالي علشان يعرف يجيب اللي في الدور العاشر. وطبعا كل ده بيحصل ابتداءا من ٩ صباحا كل يوم وتستمر فقرة السيرك دي حوالي نص ساعة من الازعاج المستمر و أبقي قابلني لو عرفت تنام تاني، وياسلام لو كنت أجازة أو تعبان أو كنت سهران وعاوز ترتاح شوية.. إبقي قابلني، لأن الصوت هيفضل يطاردك لحد ما البياع بنفسه يقرر إنه عاوز يمشي من الشارع ويبطل نعير... وتبقي بجد محظوظ لو  ما سمعتش صوته من الشارع اللي وراكم لانه طبعا مش جاي المنطقة علشان شارعكم المحظوظ بس لااااااا ده قاصد يعكنن علي المنطقة بحالها في الصبج الباكر.

وزي ما الأمريكان بيقولوا بالضبط “And The Oscors Goes To....”   الأوسكار فعلا لازم تروح للصوت الأروع  علي الاطلاق... صوت بتاع الأنابيب....... WOOOOOOOOW.... إيه الحلاوه و الجمال ده!!!! إيه القرف ده!!! يعني منطقة دخلها الغاز الطبيعي سنة ١٩٨٠ ولحد ٢٠١٤ بتاع أنابيب البوتجاز لسه بيعدي!!!! لا ومش مرة مثلا في الأسبوع أو مرتين...لاااااااااااا كل يوم وفي اليوم ٣ مرات علي الأقل، وبيعمل إيه بقي لما يدخل الشارع! إديلوا خبط بالمفك علي الأنبوبة بشكل متواصل من غير مايشيل إيده من عليها من أول ما يدخل الشارع ولحد ما يخرج منه.... يعني؛ خبط خبط خبط خبط خبط خبط خبط بلا رحمة، خبط حتي الثمالة، خبط لحد ما تصحي وتقوم تخبط رأسك في الحيطة تجيبها نصين... أه صحيح نسيت أقولكم أن الخبط ده بيبقي ٨ صباحا علشان الجو الرومانسي يكمل.  يعني علشان في إثنين أو ثلاثة من البوابين بيستعملوا أنابيب بوتاجاز لازم الشارع كله يعاني الأمرين ٣ مرات في اليوم من ٨ الصبح علشان في واحد قرر يبيع أنابيب في شارع الغاز الطبيعي. وطبعا ولازم هتسمع الخبط ده من الشارع إللي وراك الأول قبل ما البعيد يقرر يشرف الشارع بتاعك يعني هتسمع الخبط ده علي الأقل ٦ مرات يوميا... حد يقولي أدفن نفسي فين!

تعالوا نلخص بقي شكل يوم الأجازة إللي أي مصري بيحلم به علشان يرتاح من جحيم الأسبوع (وانت وحظك بقي هتبتدي بإيه الأول):

منفضة السجاد بتاع الولية المعفنة إللي مش قادرة تشتري مكنسة كهرباء لسجاجيد شقتها أم مليون جنيه

نعير بتاع الخضار إلي جايبلكم الطفح تطفحوه

وخبط بتاع الأنابيب إللي قرر إنك لازم هتكون محتاج لأنبوبة بس بتكابر

ما أحلي يوم الأجازة يا حليله

الدماغ المصرية ما بتقراش تاريخ خااااالص

الدماغ المصرية.. ما بتقراش تاريخ خالص

عجبت لشعب لما دخل مدارس نسي يحضر حصة التاريخ.... و اللي حضر الحصة مفهمش... و اللي احتمال فهم نسي... الشعب المصري كله ساقط تاريخ... مش فاكر حاجه خالص قبل ثورة يناير غير أن مبارك ديكتاتور و فاسد و حرامي... طيب هو ما كنش في غير مبارك!!!! ما كان في مصايب كبيره غيره و الشعب نسي و عدي... و النهارده بنمجد في الارهابيين القتله.... نسينا!!!! خلاص كل اللي عملوه من قتل وإرهاب و مغالطات و لعب بكيان الدين اتنسي؟؟؟؟ قتل أحمد ماهر و النقراشي و غيرهم  من الأبرياء اللي كل ذنبهم انهم وقعوا في ايد الجماعة الاسلاميه انسي!!!! إذا كنا نسينا نفتكر...

جاء في كتاب "خبايا القاهرة" لكاتب مجهول الهوية لا يعرف له مهنة أو عنوانا أو عمرا، كما لم يعرف له إنتاجا أدبيا أو معرفيا سابقا أو لاحقا، و هو الكتاب الذي وصل بالصدفة كنسخة خطية لاحدي دار النشر – لتقوم بعد ذلك بطبعه عام 2008 – أنه في عصر الاحتلال الانجليزي لمصر تعرض المجلس النيابي في مصر )مجلس الشعب( لأعاصير الاستبداد في كثير من أدواره، فقد جاء علي لسان الكاتب فقرة بعنوان "الجهلاء يصلون بأموالهم إلي البرلمان" جاء فيها ما يلي:

"و لكن الشعب الذي جاهد و ضحي و خاصم الانجليز و الطغاة من حكامه، أبي دستور إسماعيل صدقي و برلمان إسماعيل صدقي المستحدثين، و ظل يقاوم و يبذل من دمائه و ماله الكثير حتى عاد الدستور القديم و البرلمان القديم، و لكنهما عادا لمنفعة الحزبية و لتأييد المطامع و الشهوات، فقد كان هؤلاء النواب الذين خدعوا الشعب لانتخابهم. أداة فساد و رشوة و استغلال مصر لهم وحدهم للثراء و النفوذ و قضاء الحاجات لهم و لمن يلوذ بهم و لمن يدفع الثمن.

و صار كل حزب له الأغلبية في هذا المجلس المنكود الحظ يحكم كما يشاء هو لا كما تشاء مصر، و قد سانده هذا القطيع المنتفع المستغل المسمي بالنواب المحترمين.

و كان الوصول إلي مقاعده ميسورا لمن معه مال، حتى لو كان من أجهل الجهلاء و أغبي الأغبياء/ و كان المال المدفوع يتقاضاه باذله أضعافا مضاعفة عند الجلوس علي المقعد الجلدي الوثير، يتقاضاه من حاجات المضطر و شهوات الطامع و طالب العمل.

و كان الوصول إلي مقاعده ميسورا أيضا لكل صعلوك هتاف يسجد للزعامة المقدسة، و يعرف كيف ينحني و كيف يتظاهر و كيف يسير في الركاب و ظل هذا الباطل المستحدث من الحق يفسد الضمائر و يلعب بالرجال و يبث العداوات و يقطع الأرحام و ينهك الوطن و يسيء إلي مصر حتى زال سنة 1952، و في يناير سنة 1956 بشر قائد الثورة جمال عبد الناصر بدستور جديد ينتظم رغائب الشعب كلها و هو مرجوة الخير إن شاء الله، و قام مجلس الأمة منذ يوليو عام 1957".

لو شيلنا التواريخ من كل اللي مكتوب في الكتاب، مش ممكن اللي بيقراء يفتكر أن الكلام ده عن برلمان 2012!!!!! مش هو ده اللي حصل في مصر بعد ثورة يناير المجيدة 2011!!!!!! مش برده النواب الأجلاء اللي اكتسحوا أغلبية المقاعد في المجلس جاءوا بالفلوس!!! و بالضحك علي الفقراء و استغلال الحاجة!!!! و اللعب بعقول البسطاء و السطحيين!!!!!

و مش إسماعيل صدقي ده برده اللي أخد لقب عدو الشعب!! و في نفس الوقت الأخوان المسلمين في عهده كانوا بيسبحوا بنعمه و أفضاله، رغبة منهم إنه يوصلهم لأي حاجة حيموتوا عليها من أول بداية الجماعة، و بعد فترة من القهر بعد اغتيال الشهيد الراحل مصطفي باشا النقراشي علي أيد الجماعة المحترمة اللي بتتكلم في الدين. الأخوان المسلمين قتلوا النقراشي باشا. وبمناسبة الحديث عن إسماعيل صدقى فإنه لما اتولى رئاسة الوزارة سنة 1946 كان أول ما قام به هو زيارته للمركز العام للإخوان المسلمين في الحلمية الجديدة فوقف أحد أصدقاءه من الإخوان المسلمين يهنئه بتوليه الوزارة قائلا: "و اذكر فى الكتاب إسماعيل أنه كان صادق الوعد، وكان رسولا نبيا". ما شاء الله!!!! القرءان بيتفصل علي مقاس الأخوان!!!! و عدو الشعب أصبح نبيا!!!!! لا حول و لا قوة إلا بالله.....

و قبل كده كمان بحبة... لما خصصوا المؤتمر الرابع للجماعة للاحتفال باعتلاء الملك فاروق عرش مصر )الملك فاروق اللي قالوا عنه ما في الخمر(، و وقفوا في ساحة قصر عابدين هاتفين: " نهبك بيعتنا، ولاءنا على كتاب الله وسنّة رسوله".

و لما اختلف النحاس باشا مع القصر خرجت الجماهير تهتف: "الشعب مع النحاس" فهتف حسن البنا و رجاله: "الله مع الملك"، ده علي أساس إن البنا كان رسول الله في الأرض و عارف رسالة ربنا!!!!!! 

الأخوان و التمويل الأجنبي منذ عشرينات القرن الماضي:

قضية التمويل الأجنبي و الفضيحة اللي طالت مصر و المصريين في فبراير 2012 و بعد عام علي ثورة يناير المجيدة، و اللي ادعي فيها المجلس العسكري أنه ضد التمويل الأجنبي و انه قبض علي كل من له علاقة بأي تمويل أجنبي لأنه ضد مصلحة البلد.... و نسي أو تناسي أن الأخوان المسلمين و كل الجماعات الإسلامية في مصر تتلقي تمويلا خارجيا أجنبيا منذ سنوات و زاد التمويل الأجنبي بعد قيام الثورة في يناير 2011 ليتم الصرف بحرية علي مشروع الاستيلاء علي عرش مصر (أصل توزيع اللحمة و الرز و الزيت و أنابيب البوتاجاز محتاجة فلوس كثير).

المهم إن موضوع التمويل الأجنبي ده مش غريب علي الجماعة (أصلها متعودة.... دايما...) أصل أول ما أسس حسن البنا الجماعة المشئومة قبل تبرع الشركة الفرنسية التي كانت تدير قناة السويس وقتها بمبلغ خمسمائة جنيه لبناء أول مقر للجماعة فى مدينة الإسماعيلية، و قد اعتراض بعض الأعضاء المؤسسين علي ذلك باعتبار أنها شركة استعمارية لا يهمها الإسلام فى شئ، لكن البنا ما كانش هامه.... كان مهتما فى المقام الأول بتدبير التمويل اللازم (مش مهم منين و لا إزاي أصل الغاية تبرر الوسيلة)، والأهم من ذلك هو طمأنة القائمين على الشركة ومن ورائهم الأجانب المنتشرين فى منطقة قناة السويس إلى اقتصار مقاصده على الجوانب الدينية فقط حتى يتمكن من ترسيخ قواعد جماعته فى هدوء (نفاق ما بعده نفاق) .

نفس المواقف المخزية في كل ثورة:

بعد ثورة الجيش في 1052، قرر مجلس قيادة الثورة حل جماعة الإخوان المسلمين في 14 يناير 1954 : للأسباب التالية )بالضبط نفس اللي حصل في يناير 2011، التاريخ بيعيد نفس(:

١- التقاعس فى تأييد المرشد العام للإخوان المسلمين للثورة إلا بعد خروج الملك فاروق من مصر 

٢- عدم تأييد الجماعة لقانون الإصلاح الزراعي، و المطالبة برفع الحد الأقصى للملكية الزراعية فى حالة تطبيق القانون إلى خمسمائة فدان.

٣-  محاولة الجماعة فرض الوصاية على الثورة بعد حل الأحزاب السياسية القديمة.

 اتخاذ موقف المعارضة من هيئة التحرير )التنظيم السياسى(.

٤- بدء التسرب إلى الجيش والبوليس و قيام الجماعة بتشكيل خلايا سرية تحت إشراف المرشد العام للجماعة مباشرة )المسئولين العسكريين كانوا أبو المكارم عبد الحى و عبد المنعم عبد الرؤوف و حسين حمودة و صلاح شادي(.

٥- تشكيل جهاز سرى جديد بعد حل الجهاز السرى القديم الذى كان يشرف عليه عبد الرحمن السندى منذ أيام حسن البنا، و المعروف أن السندى كان على اتصال بالرئيس جمال عبد الناصر من قبل الثورة عندما كان عبد الناصر على علاقة بشكل ما أو بآخر بأغلب التنظيمات السياسية فى مصر هو وبعض الضباط الأحرار الآخرين.

٦- تم اتصال عن طريق د. محمد سالم الموظف فى شركة النقل و الهندسة بين المستر إيفانز المستشار الشرقى فى السفارة البريطانية بالقاهرة فى خلال شهر مايو سنة 1953 مع كل من منير دلة و صالح أبو رقيق ثم مع حسن الهضيبى بعد ذلك، و اعتراض مجلس الثورة وقتها على هذه الاتصالات و لكنهم استمروا فيها و قد تم رصد هذه الاتصالات فى حينه، و تم تسجيل أغلبها بمعرفة أجهزة الأمن المعنية )المخابرات العامة والمباحث العامة(.

٧- زيارة حسن عشماوى يوم الأحد 10يناير 1954 للمستر كروزويل الوزير المفوض بالسفارة البريطانية بالقاهرة مرتين فى نفس اليوم، الأولى الساعة الرابعة والثانية فى الساعة الحادية عشر مساء.

لكن طبعا المصريين في 2012 هللوا فرحا بالإخوان و حزب الحرية و العدالة... بعد كل ده محدش فاكر حاجة.. و كمان بيقدسوهم علي أساس عن الإسلام حيسود مصر... كأننا كنا مجوس بنعبد النار و فجأة الإسلام هبط علي مصر في 2012 علي إيد الجماعة!!!!!

مين قال إنهم أحسن مننا في الدين؟؟ و مين قال إنهم هما اللي حيفرضوا شرع الله في مصر؟؟ إذا كان هما أول ناس بتخالف شرع الله!!!!!

بس نقول إيه.... أصل المصريين ساقطين في التاريخ من زماااااااااان