الدماغ المصرية و الجوازه الثانيه

حبيتي واحد متجوز.... طيب و فيها إيه!!!!!! عيب!!! حرام!!!!! طبعا عيب و حرام و قله أدب و وقاحه كمان، الحب ده ضد الدماغ المصريه و لازم يتكافح ليتم القضاء عليه، أيه قله الآدب و المسخره ديه!!!!! في واحده تعمل كده، تحب راجل متجوز...... يعني هو الحب ممكن الواحد يتحكم فيه؟  مش في إيد حد انه يحب حد معين أو يمنع نفسه إنه يحب  حد تاني، الحب ده  من عند ربنا وحده  و هو وحده مؤلف القلوب. بس الدماغ المصريه بتقول غير كده، بتقول إن الواحده ماينفعش تحب راجل متجوز علشان هو كده، الحب ده ضد الدماغ المصريه و بالنسه له عيب و حرام و اللي عملت كده تستحق الرجم في ميدان عام. ليه كده بس!! يعني الواحده اللي حبت راجل متجوز المفروض إنها تموت نفسها علشان إرتكبت هذه الجريمه الشنعاء في حق المجتمع و الناس و الدماغ المصريه!!!!! و الراجل المتجوز اللي حب واحده غير مراته و عاوز يتجوزها  في الحلال بشرع ربنا المفروض إنه ينضرب بالرصاص!!! هي الدماغ المصريه بتحرم شرع ربنا بمزاجها، طبعا مش المصريين!!!!!!!!

كل حاجه عندهم عيب و حرام لو ماكانتش علي مقاس دماغهم، و علي رأي حبيبي “كل واحد دماغوا مكيفاه”. المصريين بيفصلوا المواقف علي مقاسهم، يعني لو الواحد منهم في موقف معين يبقي تصرفه في الموقف ده هو عين العقل، لكن لو غيره اتحط في نفس الموقف و اتصرف نفس التصرف يبقي كلب و يستاهل الحرق.

ليه المصريين بيدخلوا في كل حاجه، اللي تخصهم و اللي متخصهمش، حتي شرع ربنا ادخلوا فيه.... ليه؟؟؟؟

ربنا قال مثني ، ثلاث  و رباع، أما المصريين فقالوا هيا واحده  تشربنا بالهنا و الشفا.

طبعا احنا الاثنين قدام كل الناس مجرمين بنرتكب فعل فاحش،  محدش حاسس قد ايه ممكن نكون بنحب بعض و قد ايه الحب اللي بيننا ده كبير و عظيم و قد ايه كنا نتمني ان الظروف تبقي احسن من كده و حياتنا كلها تتغير، كمان محدش حاسس بالآلم و الحزن و الوجع قد ايه كبير اننا مش مع بعض و قد ايه بنتمني ان الظروف تتغيير و تبقي في صالحنا علشان نفضل مع بعض علطول، لكن مين يفهم و يقدر، كل الناس بصلنا علي اننا مجرمين، مجانيين و نستحق انهم يفضلوا يدونا في مواعظ و حكم علشان نخرج من الجنان اللي احنا فيه.

له الناس متحسش ببعضها، و تتحترم رغبات بعضها، ليه الناس متخليهاش في اللي يخصها و تبطل تتدخل في خصوصيات غيرها، ليه المصريين مبيحترموش الخصوصيات و حقوق الغير، و ان كل واحد ليه دماغه اللي مكيفاه و مبسوط بتفكيره، و كل واحد حر فيما لا يضر<

مش كده و الا ايه!!!!!!!! و الله يرحمك يا فؤاد يا مهندس

الدماغ المصريه و المطلقات

الدماغ المصرية من الصعب تحليلها أو تعريفها بصفة معينه أو حتي فهمها بسهوله. ليه كل حاجه في دماغ المصريين بتبقي صعبه علي المصريين برضه فهمها. الأب المصري بيكافح علشان يعلم بنته أحسن علام علشان يبقالها مستقبل و يتباهي بيها في كل حته، و هو نفسه اللي بيرفض جواز إبنه من بنت تعليمها أحسن منه، ليه محدش عارف!!!! ليه الحاجه اللي تخصنا هي اللي تبقي مهمه و نفس الحاجه لو عند غيرنا تبقي مش مهمه!!!!!! لو بنتك مطلقه يبقي كل المطلقات غلابه و ضحايا و يستاهلوا الحنيه و الشفقه و يستاهلوا تعويضهم بأحسن من اللي خدوه، لكن لو واحده غريبه مطلقه تبقي وحشه و مجرمه و أكيد جوزها شاف منها الويل و بتدعي إنها غلبانه.... لو بنتك هي المطلقه تتمنالها انها تتجوز راجل كويس و مش متجوز، لكن لو ابنك عاوز يتجوز واحده مطلقه تقوم الدنيا و لا تقعدش..... و تبقي البنت المطلقه كويسه بكل المقاييس، متعلمه تعليم عالي و متربيه و أخلاقها فوق الوصف، بتشتغل في مكان كويس و مرتبها عالي و يمكن أعلي من اللي عاوز يتجوزها، ناجحه في شغلها و محبوبه من كل الناس، دمها خفيف و عشرتها حلوه، لكن كل ده يهون علشان ربنا قسملها أنها تبقي مطلقه، طبعا لأن ده عيب خطير و لازم نعالجه برجم أي مطلقه تسول لها نفسها إنها تفكر في الجواز مره تانيه و تفكر انها تعيش حياه مستقره زي أي بني آدم خلقه ربنا بيحب و يتجوز و يخلف و يعيش حياه سعيده فيها مشاكل - عادي يعني - و يتصالحوا و الحياه تستمر، عادي زي أي حياه و كله بيعدي في الأخر، لكن إزاي!!!! تعيش الحياه ده إزاي و هي مطلقه!!! المطلقه لازم تدفع ثمن قسمتها و نصيبها، لازم تدفع ثمن قضاء ربنا و قدره و تعيش طول حياتها لوحدها أو تتجوز بس علي قد إمكانيتها.... يعني تتجوز واحد أكبر منها بكتير، أرمل أو مطلق و عنده أولاد طبعا و مطلوب منها إنها تربيهم علشان تنول الرضا و ممكن كمان يكون علي زمته زوجه تانيه و مش من المفروض إنها تعترض (مطلقه بقه).... و تستمر في دفع الثمن اللي حتفضل تدفعه طول عمرها، علي أساس إنه مش كفايه مراره الطلاق و الأحداث اللي سبقت الطلاق، أصل أكيد هي مصحيتش من النوم لقيت نفسها مطلقه، أكيد مرت بظروف مهببه و صعبه، من إهانه و ضرب و سهر الليالي في تفكير مر و يوم يجي من بعده امر، و ذل و مهانه و بوس الرجلين علشان المحروس المفتري يتنازل و يتواضع و يبطل بهدله و يطلقها و يعتقها لوجه الله وحده..... وبعد كل ده الدماغ المصريه تشتغل بقه.... كل واحد رجله شيلاه يقول في حقها كلمه، و كل واحد خياله خصب يبتكر عليها حدوته، و في الأخر يجي الأب يرفض يجوزها إبنه علشان مطلقه، طبعا عنده حق ما هي كلبه جرباه و إبنه سيد الناس، ده حتي إبنه ده أحسن من سيدنا النبي عليه أفضل الصلاه و أزكي السلام (آستغفر الله العظيم) الرسول عليه الصلاه و السلام تزوج من آفضل نساء العالمين السيده خديجه بنت خويلد و هي الأرمله الأكبر منه سننا و هو آفضل شباب قريش، و لكن الله ضرب لنا مثلا برسولنا الكريم و جعله لنا قدوه (و لكم في رسول الله أسوه حسنه) لكن نقول لمين.... ينفع يبقي حب الأب أو الأم لآولادهم يخليهم ينسوا ديننا الكريم، ينفع ننسي الأقتداء برسولنا الكريم علشان نفسنا أو علشان مظاهر إجتماعيه فارغه.... بجد الدماغ المصريه ملهاش حل..... دماغ تودي في ستين داهيه.... دماغ تودي جهنم و العياذ بالله...... ربنا يرحمنا من الدماغ المصريه اللي ليها في كل خرابه عفريت.....